【厚德邨】再現射鴿狂徒
23-11-2020
有熱心義工報料，今日又喺厚德邨見到被竹簽插中嘅鴿仔！咁啱有位男士經過都見到，希望一同幫義工拯救受傷鴿仔。但一位屬於 姓王叫卓雅 區議員辦事處嘅人冇幫忙不特止，仲反問在場人士見唔見到邊個餵鴿。(黑人問號??)
先唔講姓王辦事處嘅人平時又要封水池唔俾雀仔飲水，又話要組織民間趕雀隊有幾多餘 ;
呢個用竹簽射鴿嘅變態已經唔係第一次。
喺上年8月同10月，分別有幾次都見過被竹簽插住嘅鴿仔，連兇器都有執過... 但由於兇徒應該係匿埋射竹簽，真係要查CCTV 先有可能拉到佢
問題就嚟喇，將軍澳區發現虐殺鴿差不多全港稱冠，當中包括多宗鴿鴿從後比人大力踩扁腸流，多宗切翼s, 行人路中心被車輾爛，瘋狂周圍放老鼠膠痴死哂啲動物。
宗宗都係睇字都有聲既，
當大家問該區姓王叫卓雅嘅議員，問佢可以做啲咩，佢嘅同事就話「可能會裝CCTV去阻止啲人餵鴿，但係要同房署攞權限，又或者有啲人會話侵佔私人 (下删一千字) 」
大家睇到呢到，你可能會話 - 我聽緊啲乜? 係囉！而家有人虐待動物，問你可以點捉個變態呀⋯⋯
可能姓王議員真係要學吓其他做實事嘅議員。就好似當知道用老鼠膠係錯嘅方法去達到減低老鼠岀沒嘅數目，即刻就話會改善會用更人道嘅方法去做。唉，真係咩人都有，你哋話係唔係呀？
2-12-2020【#將軍澳虐鴿】成功營救受傷鴿鴿 竹籤直插前胸
大家仲記唔記得上個星期有人發現11月23有鴿 ，竹籤鴿，俾人虐待？
好消息係上星期六28號發現人經多次捕捉，終於捉到佢啦！壞消息係佢嘅竹籤已經由背脊直插穿前胸
發現人即日帶咗佢去睇醫生，獸醫直斥：一定係人為嘅動物虐待，好彩冇傷及其他重要器官同埋頸動脈，如果唔係就連救都冇得救。
發現人已經報警，愛護動物協會亦都會跟進。而受傷嘅小朋友就係發現人屋企休養緊。
小編真係唔明白，點解一個人可以對無辜嘅小動物做出如此野蠻嘅行為？你唔鍾意佢，可以行開唔理佢，傷害咗佢對你來講有咩好處？
香港雀鳥生活已經艱難，又冇正常嘅種子樹作為佢哋嘅食物源頭、議員又話要封水池唔比水佢飲，虐鴿嘅人又唔去捉，淨係不斷問人點解要餵雀。
咁請問佢哋可以點樣生存？講得好聽啲就係減低數目，但事實根本就係要趕盡殺絕。與動物共融？廢話！
人類作為萬物之靈，就係要利用我哋嘅智慧同對世界嘅認識，去令呢個地球變得更加美好。該區議員唔捉，我哋自己捉 ; 政府唔推動教育，我哋自己去推！
喺呢度要好多謝各區朋友出心岀力，一路以來協助小動物，多謝各大傳媒幫手報道。
如果你都想幫忙既話，可以從小步開始，同你隔離嗰個講香港雀仔係冇禽流感㗎！逐一感染身邊嘅人
－ 有關新聞 －
【大型噴水池減少開放時間】
@厚德王卓雅
將軍澳疑現虐鴿狂徒-白鴿慘遭竹簽插背
@頭條日報
野鴿身插竹籤路邊覓食 | 將軍澳現狂徒疑射鴿施虐
@晴報