隻雀斷佐頸？？

PMV，唔會傳染人，唔會傳染人，唔會傳染人，個病亦唔會令佢死嫁
最大問題係佢喺街傻下傻下，會俾車車死⋯
新一代嘅價值觀同老一輩唔同晒，多佐PMV鴿會被愛惜救起，如果你第一次照顧PMV，可以參考一下：

💡咩叫PMV?
PPMV1 = pigeon paramyxovirus type 1
個病毒嘅英文名叫 Paramyxo Virus, short form = PMV

💡隔離幾耐好？
如果屋企嘅鴿係健康肥美，唔需要太擔心感染嫁
我自己地方好細冇房間做隔離，放角落最底層用布包晒三邊，同一房間養，分開放風。照顧過六隻PMV, 冇試過傳染到其他雀
有資料話六星期後唔會再有傳染性，又有資料話兩個月，穩陣啲可以隔離兩個月吧

💡照顧上需要：
以我所知，PMV呢個virus 主要會攻擊鴿嘅
- 神經系統
- 腎臟&消化系統

神經系統被攻擊，所以好多鴿會fing下fing 下、自轉、扭頸（特別係專心想食野時/ 緊張時），呢個係最明顯嘅PMV 特徵，
但有呢啲病徵，又唔代表100%係PMV，因為其他原因例如 細菌感染 都可以影響神經
亦可試下買PMV tester 測試（from淘寶，但準確程度不詳，我試過拎黎test 一隻完全冇pmv 徵狀嘅鴿都係兩條線⋯）

講到扭頸，無論係咩事扭頸，對呢啲神經問題：
維他命B雜, amino acid 對雀仔神經嘅修復有好大幫助，頭幾星期好關鍵，做得好嘅話阿鴿之後可以睇落好正常嫁

水：腎功能受損方面，部分pmv 會飲好多水同屙好多尿，需要大量飲水（100ml 以上！），你可以間唔中提供電解水俾鴿鴿補充番電解質（不是長期，只係頭一兩星期隔幾日俾一餐）

另外，因為腸道都會受到攻擊嫁，所以一星期可以加一or 兩次益生菌入水
因為佢地fing 下fing下睇見都牙煙呀，同埋佢地有機會突然暈倒，一緊張就扭頸更嚴重，所以唔可以俾一兜水佢地，怕會傻更更浸死喺水兜。要用淺又重身嘅碟（如豉油碟，*重身先唔反嫁）提供水俾佢。亦可參考下相片試下用呢款水樽，估唔到我嗰啲又真係會飲到 當然你需要留意住份量確保一下佢係有飲嘅，如果冇就要tube feed 喇

食：食兜方面，要俾深啲同防飛糧嘅兜（唔係執死你呀），我一般提供佢體重10%食物，例如300g鴿子要提供30g 食物，如果知佢會食到跌晒當然要俾定多啲啦
由於佢地打緊仗，要有足夠營養，我會視乎佢地食量，每日餵下雀仔奶（加入維他命b雜水/ multivitamin ）
雀鳥專用奶：餵幾多奶，視乎有冇自己食夠嘢
我會得閒磅下食物份量，下一日換糧時又磅下，知道大概食到幾多，再計劃補幾多奶
亦會間唔中磅下隻鴿有冇輕佐勁多
例如我啲pmv鴿有自己食15-20g 食物，我會一日餵一次雀仔奶
餵之前摸摸嗉囊會唔會太多糧食（會摸到一粒粒），如冇好多糧食，我餵15ml，一日一餐，反正都要餵supplement 加晒落奶入面，唔洗分開逐樣餵嚇佢幾轉

嗉囊如好多野食 就唔可餵住 會太多嘔出黎

*如果唔識摸嗉囊又唔識餵奶，可以出post 睇下有冇附近谷友可支援教教

奶用60-70度（按包裝說明溫度為準）水攪，要狂攪，壓溶啲奶塊，否則會塞軟管塞佐千祈咪諗住大力啲吱，會成支軟管噴甩佐喺口入面超危險嚇死你

攪好奶後先落supplement，再攪勻

維他命不可受太熱，如加落奶要臨食先落

益生菌更加唔可受熱，可分開用室溫食水開再餵

💡籠嘅Setting 方面，初時我會墊尿墊俾佢地休息得舒服啲，因為佢地有時控制唔到，會撞親或叉錯腳，或啲毛叉佐落籠間折斷但用尿墊有個壞處就係佢地會踩番自己啲屎同可能頭頂會hi 到啲屎不過要衡量一下唔好太常換墊（會嚇親佢地），但又換得夠 衛生程度ok到情況有改善，可考慮唔再舖尿墊，俾企棍、木頭佢地企

💡清潔方面，想最安心可用Virkon / f10SC清潔

💡曬太陽方面我覺得要視乎隻pmv 鴿嘅情況 尤其係拎出街 對佢地好大壓力佢地本身已經好暈 初一星期我唔會俾佢地曬太陽住 感覺強光會刺激 如人類唔舒服時會怕曬除非阿鴿好親人完全唔驚 否則都盡量俾佢安靜休息 餵奶換墊清潔一次過 減短受壓受驚嘅時間盡量寧靜、安全、乾爽曬太陽無疑係好多好處同對雀仔係必須嘅，所以唔可以停太耐嫁

💡補充品

PMV 病毒冇藥可根治，只可用唔同嘅補充品幫佢地渡過 同病狀輕啲其實你俾個棲身之所佢，唔洗俾車車死已經係最大嘅幫忙但如果能力同金錢許可，建議嘅supplement 如下：

🔴 Vitamin B 水

能幫助神經修復

🔴 Multivitamin

增強免疫力，幫忙打勝仗

*注意不能長期俾過量，過多不能排出身體會有害

🔴 Liverclens

成份有助佢地神經recover同成長

🔴 益生菌

神經腎臟消化系統各樣都被攻打，希望多啲益菌幫佢腸道健康啲

💡注意1

以前以為扭頭扭頸就= PMV, 但原來唔係咁！

細菌感染冇得到適當嘅藥物治療，菌會影響神經，已經唔係維他命b 同益生菌可以幫到佢，唔及時治理分分鐘瓜老襯嫁

大家不妨出post 俾多啲details，聽聽其他意見

💡注意2

PMV嘅恐怖扭頸症狀令人好易忽略佐其他小病，如canker / 傷風，小病冇得到治療又會麻鬼煩

因為同病毒打緊仗，又因為扭頸食唔到野冇營養，好多時會免疫力超級低，所以要留意其他方面喔

Pmv 多數唔會令腳仔凍，如果摸落腳仔唔係暖就要注意喇，因鴿體溫比人類高，摸落明顯係暖/熱 先係正常

大家不妨出post 俾多啲details，可能會有鄰近谷友仗義幫手檢查嫁

💡注意3

PMV 呢家野，唔會完全好番晒，扭頸情況會時好時壞 野放隨時出車禍，所以請唔好覺得放生佢係為佢好喔。鴿子其實都幾懶惰，份人好樂觀，冇乜聽講有情緒問題（如咬自己啲毛），為佢好嘅，好好地為佢打造一個鴿角落吧

最後，每個救鴿嘅同路人會因失敗嘅經驗、成功嘅經驗、聽人教過嘅方法、自己睇嘅知識，種種原因 唔同時期有唔同嘅照顧方法，大家常保持謙卑，互相學習，鴿鴿就有福了，歡迎大家留言照顧技巧，一齊再改進💪🏼😊